Kínverskur hraðbanki gæti stóraukið viðskipti fyrirtækja

Íslendingar gætu hagnast á því að aðlaga ferðamannastaði að Kínverjum í framtíðinni segir breskur markaðsgreiningarsérfræðingur. Hann segir Breta hafa gert slíkar breytingar með góðum árangri.

Trendwatching eða tískuvöktun eins og hægt er að orða það á íslensku er að fylgjast með hvaða stefnur og straumar eru efnilegir á markaðnum.

Henry Mason er sérfræðingur í markaðsgreiningu en hann hélt í dag fyrirlestur á ÍMARK deginum í Hörpu og fjallaði þar um tólf mikilvæga strauma og stefnur sem fyrirtæki þurfa að hafa í huga á þessu ári. Einn af þeim er vöxtur í kínverskum ferðamannaiðnaði.

„Það er mikil fjölgun kínverskra ferðamanna og fyrirtæki bjóða þá í auknum mæli velkomna. Nú er þetta fólkið með peningana og þess vegna aukum við þjónustuna

við kínverska neytendur."

Til dæmis séu hótel farin að bjóða upp á kínverskan mat og þjónustu, flugvellir hafa sett upp kínversk skilti og flugvélar bjóða kínverskar bíómyndir.

„Hið fræga vöruhús Harrods setti upp kínverska hraðbanka því kínversk kort samrýmast ekki vestræna kerfinu. Við þetta jókst salan til kínverskra neytenda um 40%. Fyrirtæki sem aðlaga sig ná miklum árangri."

Hann segir íslenska ferðaiðnaðinn þurfa að undirbúa sig fyrir komu Kínverja til dæmis með því að innleiða svipaðar breytingar og erlendis. Það sé hins vegar ekki óeðlilegt að Íslendingar hafi verið tregir til að selja landsvæði til kínverjans Huang Nubo til ferðmannauppbyggingar. Svipuð viðbrögð séu nú í Bretlandi vegna áforma um að byggja upp kínverskt ferðamannaþorp í Wales.

„Þegar talað er um land og fasteignir er það allt annað en að bæta nýjum lið á matseðilinn."