"Veðrið er svo gott og það eru bara allir í góðu skapi“

„Þetta er alveg frábært," segir Guðmundur Birgir Halldórsson, viðburðarstjórnandi Menningarnætur um hátíðina sem hefur heppnast einstaklega vel. Um fimmtíu þúsund manns voru í miðbænum síðdegis og ekki óvarlega áætlað að fjöldinn nái hundrað þúsund þegar hátíðin nær hápunkti með flugeldasýningu klukkan ellefu í kvöld.

Guðmundur Birgir segir það einkenna Menningarnótt í ár hversu afslappað og glaðlegt andrúmsloftið er. „Veðrið er svo gott og það eru bara allir í góðu skapi," segir Guðmundur Birgir þegar hann leitar skýringar á vel heppnaðri hátíð.

Tvennir tónleikar standa nú yfir. Annarsvegar á Ingólfstorgi sem Bylgjan stendur fyrir og á Arnarhóli þar sem RÚV stendur fyrir tónleikum líkt og fyrr ár. Guðmundur segir það athyglisvert hvað gestir Menningarnætur virðast dreifa sér um miðborgina en það er óhætt að segja að það megi finna stanslausa dagskrá frá Hlemmi og út á Granda í Vesturbæ Reykjavíkur.

„Svo var Harpan umsetin listamönnum í dag," segir Guðmundur en Harpan lék stórt hlutverk á Menningarnótt en hápunkturinn var líklega þegar stórleikarinn Russel Crowe steig á stokk og söng fyrir gesti og gangandi.

Hátíðin hefur gengið stóráfallalaust fyrir sig í allan dag. Þá verður lögreglan með sérstakt eftirlit með unglingadrykkju í kvöld og mun hella áfengi miskunnarlaust niður finnist sá drykkur á ólögráða einstaklingum.