Ásdís með áttunda lengsta kastið | Evrópumeistarinn úr leik

Ásdís Hjálmsdóttir varð í áttunda sæti af 42 keppendum í undankeppni spjótkasts kvenna á Ólympíuleikunum í London í morgun og komst örugglega áfram í lokaúrslitin eins og áður hefur komið fram.

Ásdís kastaði spjótinu 62,77 m í fyrstu tilraun og stórbætti þar með þriggja ára gamalt Íslandsmet hennar um einn metra og 40 sentímetra. Sannarlega glæsilegur árangur.

Hún þurfti ekki að kasta aftur í undankeppninni í morgun þar sem allir þeir sem kasta yfir 62 metra eiga öruggt sæti í úrslitunum. Alls fóru níu keppendur yfir þá vegalengd en síðustu inn í úrslitin var Kathryn Mitchell frá Ástralíu á 60,11 m.

Athygli vakti að ríkjandi Evrópumeistari í greininni, Vira Rebryk, komst ekki í úrslitin. Hún náði mest 58,97 m og hafnaði í nítjánda sæti. Hún náði yfir 62 metra í síðustu tilraun sinni en gerði þá ógilt.

Þess ber þó að geta að Rebryk var mjög nálægt 62 metra línunni í fyrstu tilraun sinni. Kastið var gott og gilt en þegar Rebryk sá að það fór ekki eins langt og hún vildi gerði hún viljandi ógilt með því að stíga yfir línuna. Það kast hefði dugað henni til að komast í úrslitin - hefði hún leyft því að standa.

Ólympíumeistarinn og heimsmethafinn í spjótkasti kvenna, Barbora Spotakova frá Tékklandi, átti lengsta kast dagsins eða 66,19 m. Christina Obergföll frá Þýskalandi varð önnur á 66,14 m og Sunette Viljoen frá Suður-Afríku þriðja með 65,92 m.

Úrslitin fara fram á fimmtudagskvöldið.