Elda og gleðjast til styrktar SÁÁ

Yfirkokkur veitingastaðar Jamie Oliver í London í eldar fyrir landann.

„Mér fannst það svo fallegt sem þeir eru að gera þarna úti að mig langaði að setja upp kvöld í þeirra anda hér,“ segir Leifur Kolbeinsson, eigandi Kolabrautarinnar.

Andrew Parkinsson, yfirkokkur á Fifteen veitingastaðnum í London er væntanlegur hingað til lands í janúar ásamt fríðu föruneyti frá staðnum, sem er í eigu sjónvarpskokksins Jamie Oliver. Jamie stofnaði staðinn árið 2002 í tengslum við verkefni sem snýst um að hjálpa ungu fólki í erfiðleikum. „Hann tekur krakka inn á veitingastaðinn og kennir þeim og hjálpar. Svo fer allur ágóði Fifteen í styrktarsjóð til að hjálpa ungu fólki í erfiðum aðstæðum,“ segir Leifur.

Styrktarkvöldið verður haldið á Kolabrautinni 19.janúar og er aðgangseyrir með mat og víni 15.000 krónur og rennur hann óskertur í unglingastarf SÁÁ. Gallerí 8 gefur einnig listaverk á hljótt uppboð til styrktar málefninu og öll vinna kvöldsins og hráefnið fyrir er gefið. Andrew og félagar annast eldamennskuna en kokkar Kolabrautarinnar verða þeim til aðstoðar. „Ég skræli það sem þeir segja mér að skræla,“ segir Leifur og hlær. Miðasala hefst í næstu viku og verður hægt að nálgast allar upplýsingar á Kolabrautinni.