Lagði lækninn sinn að velli

Hinn ellefu ára gamli Felix Steinþórsson er einn efnilegasti skákmaður landsins, en hefur þó lengi glímt við erfiðan hjartasjúkdóm og því dvalið langdvölum á Barnaspítala Hringsins.

Skákakademían stendur í dag og á morgun fyrir skákmaraþoni í Kringlunni til að safna fé til tækjakaupa fyrir Barnaspítala Hringsins, og tók Felix af því tilefni eina bröndótta við lækninn sinn, Sindra Valdimarsson, og hafði sigur.

Hrafn Jökulsson, hjá Skákakademíunni, segir maraþonið hreina fjölskylduskemmtun. „Við vonum að sem flestir geti komið og lagt góðu málefni lið. Skákkunnátta er algjört aukaatriði. Það er gleðin og málstaðurinn sem skiptir hér öllu."

Þeir sem vilja leggja málefninu lið geta mætt í Kringluna milli klukkan tólf og sex í dag og á morgun.