Góður boðskapur tæklaður

„Þetta er alíslenskt barnaefni þar sem boðskapurinn um að vera góður við aðra er tæklaður á hressilegan og gleðilegan hátt,“ segir Þorleifur Einarsson, leikstjóri barnaefnisins Daginn í dag.

Daginn í dag 2 kom út á DVD á dögunum og samanstendur af þremur 33 mínútna löngum þáttum. Fyrri diskurinn kom út í lok árs 2010 og hefur notið vinsælda hjá yngri kynslóðinni. „Eftirspurnin varð svo mikil eftir fyrsta diskinn að við gátum ekki annað en búið til aðra þáttaröð,“ segir Þorleifur en tökur stóðu yfir í sumar og var þriðja serían þá tekin upp í leiðinni.

Töluverðar breytingar hafa orðið frá fyrstu þáttaröðinni. „Við erum orðin töluvert sjóaðri núna,“ segir Þorleifur hlæjandi og bætir við að þættirnir séu fullir af alls kyns ævintýrum, söngvum og sögum og tæknibrellurnar betri en þekkist í íslensku barnaefni. „Þarna er líka hópur barna sem syngur sunnudagaskólalög og skemmtilegar brúður sem kíkja í heimsókn. Það er aldrei dauður tími í Daginn í dag,“ segir Þorleifur.

Hlutverk Hafdísar og Klemma eru sem fyrr í höndum Hafdísar Mariu Matsdóttur og Jóels Sæmundssonar. Mæja og Haffi, leikin af Ingunni Huld Sævarsdóttur og Lárusi Páli Birgissyni, eru þeim innan handar auk þess sem Tinna táknálfur hefur bæst í hópinn. „Hún syngur sálmana sem eru í lok hvers þáttar á táknmáli en krakkarnir túlka hin lögin með tákn með tali hreyfingum, alveg eins og í fyrri seríunni,“ segir Þorleifur.