Sigraði í tveimur dansflokkum

Leifur Eiríksson sigraði í tveimur dansflokkum í fyrsta „street“ danseinvíginu sem haldið hefur verið á Íslandi. Danskeppnin fór fram á laugardaginn fyrir viku og sigraði Leifur bæði í toprock og break-dansi.

„Toprock er í raun standandi hluti break-dansins, allt sem dansarar gera áður en þeir fara í gólfið. Toprock gefur dönsurum færi á að sýna stílinn sinn án þess að þurfa að bæta fimleikum við dansinn.

Þetta eru fyrstu break danssporin og mun eldra en allir fimleikarnir,“ útskýrir Leifur hefur æft break-dans frá árinu 2000 og var lengi meðlimur í danshópnum Fifth Element. Hann kveðst ekki hafa æft mikið fyrir keppnina og varði æfingatímanum í að dusta rykið af gömlum danssporum.

„Ég tók nokkrar æfingar fyrir keppnina og fór yfir mína helstu styrkleika. Upphaflega ætlaði ég að keppa með hóp en einn úr hópnum slasaði sig tveimur dögum fyrir keppni þannig að við urðum að hætta við þau áform.“

Keppendur í break-dansi voru alls sextán og að sögn Leifs voru þeir allir mjög færir dansarar. Það stóð því tæpt á munum milli hans og annara í þeim flokki en hann sigraði nokkuð örugglega í toprock.

„Það var mjótt á munum í breakinu. Þetta var rosaleg keyrsla og maður fékk bara um tvær mínútur í hvíld á milli dansa. Ég var gjörsamlega búinn á því í síðustu lotu og sigraði eiginlega á viljastyrknum einum saman,“ segir hann.

Leifur starfar sem tónlistarmaður samhliða því sem hann leggur stund á dansinn. Hann hefur hug á að færa sig í auknum mæli yfir í dansinn aftur en segir það ekki framtíðarstarf. „Það er ekki hægt að hafa í sig og á með break-dansi en það er góð líkamsrækt og ágætar aukatekjur,“ segir hann að lokum.