Markmiðið er að nýta dramatíkina

Draugar, dauði, drykkja, vonleysi, vitfirring og volæði eru einkunnarorð tónleika þeirra Jóns Svavars Jósefssonar bass-barítónsöngvara og Guðrúnar Dalíu Salómonsdóttur píanóleikara í Menningarhúsinu Hofi á Akureyri í kvöld.

Eru þau að reyna að koma Norðlendingum í þunglyndiskast? „Já, ætli það sé ekki bara markmiðið,“ segir Jón Svavar. „Allavega að hræða þá svolítið. Við erum að leika okkur með svolítið þung ljóð sem mörg hver fjalla um dauðann, eða drauga, eða drykkju og almennt bara um alls konar vonleysi. Markmiðið er að nýta dramatíkina sem einmitt gerir þessi lög og ljóð svo flott.“ 

Á dagskránni eru sönglög eftir Karl O. Runólfsson, Sigvalda Kaldalóns, Árna Thorsteinson, Jón Leifs, Jón Ásgeirsson, Sveinbjörn Sveinbjörnsson og fleiri við ljóð stórskálda á borð við Davíð Stefánsson, Jóhann Sigurjónsson og Grím Thomsen. „Þetta er eldfjörugt prógramm,“ fullyrðir Jón Svavar. „Við sköpum stemningu með ljósum og segjum sögur sem tengjast lögunum og höfundum þeirra. Nú eða segjum bara einhverja lélega brandara á milli laga, það fer eftir því hvernig stemningin verður.“ 

Tónleikarnir fara eins og áður sagði fram í Menningarhúsinu Hofi á Akureyri í kvöld klukkan átta.

- fsb