Fer í tónleikaferð á húsbíl

Ómar Guðjónsson, einn fremsti gítarleikari þjóðarinnar, hefur gefið út sína fjórðu sólóplötu, Út í geim. Um eitt ár er liðin síðan hugmyndin að plötunni kviknaði. „Þá fór þetta ferli af stað hjá mér að hafa allt í einu þörfina til að skrifa texta og syngja.

Það var mjög skrítið að fá það allt í einu upp í hausinn," segir Ómar. „Hingað til hefur gítarinn séð um að syngja en síðan allt í einu fór ég að hoppa í þá djúpu laug að reyna að tjá mig með orðum."

Platan var tekin upp í stofunni heima hjá Ómari. „Fjölskyldan flutti að heiman. Eitt barnaherbergið varð mixer-herbergi og eitt varð matarherbergi. Þetta var mikið ævintýri." Hann lýsir plötunni sem blöndu af afrótónlist, rokki, djassi og fleiri stefnum.

Öll tólf lögin og textarnir eru eftir Ómar fyrir utan einn texta eftir Jónas Sigurðsson.

Þeir hafa einmitt spilað saman í Ritvélum framtíðarinnar, hljómsveit Jónasar. Í næstu viku fara þeir í tónleikaferð á húsbíl þar sem þeir spila undir hvor hjá öðrum á meðan þeir kynna nýjustu plötur sínar. „Við verðum með tvö trommusett, tvo bassa, tvo gítara og tvö hljómborð. Við prófuðum þetta á Borgarfirði eystri í sumar. Það gekk svo vel að við ákváðum að þetta yrðum við að gera í vetur."

Útgáfutónleikar Ómars verða í Iðnó í kvöld kl. 21.

-fb