Orðaður við Óskarinn

Myndar Bens Affleck, Argo, er beðið með nokkurri eftirvæntingu en myndin verður frumsýnd vestanhafs á morgun. Affleck bæði leikur og leikstýrir myndinni sem talin er líkleg til verðlauna á Óskarsverðlaunahátíðinni á næsta ári.

Myndin er lauslega byggð á sannsögulegum atburðum og fjallar um hvernig bandaríska leyniþjónustan aðstoðar sex diplómata við að flýja frá Íran þegar byltingarsinnar hafa tekið yfir sendiráðið. Ásamt Affleck eru þeir Alan Arkin, Bryan Cranston og John Goodman meðal leikara í myndinni.

Gagnrýnendur eru enn sem komið er jákvæðir í garð Argo sem fær fullt hús stiga frá Entertainment Weekly og Boxoffice Magazine.