Led Zeppelin í bíó

Tónleikamynd með endurkomu Led Zeppelin árið 2007 í O2 höllinni í London verður sýnd í Háskólabíói miðvikudaginn 17. október. Tuttugu milljón manns sóttu um miða á tónleikana en aðeins átján þúsund duttu í lukkupottinn.

Fyrir fimm árum hafði Led Zeppelin ekki spilað saman í 27 ár eða síðan hún lagði upp laupana 1980 þegar trommuleikarinn John Bonham lést. Endurkomutónleikarnir heppnuðust mjög vel og spiluðu þeir Jimmy Page, Robert Plant, John Paul Jones og Jason Bonham, sonur Johns Bonham, í rúmar tvær klukkustundir. Tónleikarnir verða gefnir út á geisla- og mynddiski í nóvember.

Led Zeppelin hefur selt yfir þrjú hundruð milljónir eintaka af plötum sínum. Einungis fimm aðrir flytjendur geta státað af hærri sölutölum. Sveitin hefur unnið til yfir þrjátíu stórra verðlauna, þar á meðal til fernra Grammy-verðlauna.