Kannanir benda til aukinnar streitu

Átta af tíu samevrópskum skoðanakönnunum sýna að fólk hefur áhyggjur af vinnutengdri streitu. Að könnuninnni stóð Ipsos MORI fyrir hönd Vinnuverndarstofnunar Evrópu. Könnuð voru viðhorf 35 þúsund manns í 36 Evrópulöndum til málefna sem tengjast vinnuvernd.

Í fréttatilkynningu um niðurstöðurnar kemur fram að 80 prósent vinnandi fólks í Evrópu telji að fjöldi þeirra sem þjáist af vinnutengdri streitu muni aukast næstu fimm árin og rúmur helmingur telur að aukningin verði umtalsverð. „Hlutfallið er þó talsvert lægra hér á landi þar sem aðeins 47 prósent telja að vinnutengd streita muni aukast á næstu árum,“ segir í tilkynningunni.

Niðurstöðurnar eru sagðar í takt við niðurstöður ESENER könnunar Vinnuverndarstofnunarinnar um nýjar og aðsteðjandi áhættur á vinnustað. Hún leiddi í ljós að 79 prósent stjórnenda telja að streita sé vandamál í fyrirtæki þeirra. „En það þýðir að vinnustreita er jafnmikilvægt úrlausnarefni fyrir fyrirtæki og vinnuslys.“ Þá kemur fram að Íslendingar eru heldur bjartsýnni en meðalevrópubúinn á að stjórnendur fyrirtækja komi til með að taka mark á kvörtunum varðandi öryggi og heilbrigði á vinnustað. Alls telja 74 prósent aðspurðra í Evrópu að svo muni vera, en 86 prósent Íslendinga.- óká