Óttast að Marel þurfi að fara úr landi

Theo Hoen, forstjóri Marels, óttast að fyrirtækið þurfi að yfirgefa landið verði gjaldeyrishöft lengi við lýði. Þá sé nauðsynlegt að skýra hvernig peningamálum verði hér háttað til frambúðar. Hoen flutti erindi á ráðstefnu sem Landsbankinn stóð fyrir í fyrradag undir yfirskriftinni „Hvað þarf til að halda íslenskum fyrirtækjum í landi?“

Hoen sagði margt jákvætt við að hafa höfuðstöðvar á Íslandi. Hér væru langtímahluthafar sem gæfu fyrirtækinu tækifæri til að vaxa og dafna. Þá fengi það rými til að athafna sig svolítið utan sviðsljóssins þar sem fyrirtæki í íslensku kauphöllinni nytu minni athygli en til dæmis fyrirtæki í kauphöllinni í heimalandi Hoen, Hollandi.

Þá væri hér vel menntað vinnuafl og samfélag sem styddi dyggilega við starfsemina.

Hoen sagði aftur á móti ýmsa ókosti við Ísland, helst gjaldeyrishöftin og krónuna.

Höftin og gengisáhætta vegna flökts krónunnar gerðu það að verkum að alþjóðlegir fjárfestar vildu ekki fjárfesta í Marel þrátt fyrir að lítast vel á fyrirtækið. Sagðist Hoen því óttast að sá vegur sem Marel væri á hér innanlands væri blindgata yrði ekki leyst úr þessum vanda.

Tók Hoen dæmi af bandarískum fjárfesti sem ætti stóran hlut í Marel.

Hoen hafði eftir honum að hann þyrfti að reikna með 20 til 30 prósenta afföllum af virði hluta sinna vegna gengisáhættu. Af þessum sökum fái Marel fáa erlenda fjárfesta sem séu alþjóðlegu fyrirtæki nauðsynlegir.

Þá gerðu höftin Marel einnig erfitt fyrir að veita starfsmönnum kauprétti sem væri svo aftur nauðsynlegt til að lágmarka starfsmannaveltu. Loks nefndi Hoen skort á tæknimenntuðu vinnuafli sem ókost við íslenskt atvinnulíf.

- mþl