Innstæðutryggingar alltaf út í krónum

Már Guðmundsson seðlabankastjóri kallar eftir því að verulegar takmarkanir verði settar við lánveitingum í erlendri mynt til heimila. Þá telur hann æskilegt að festa í lög að innstæðutryggingar verði aðeins greiddar út í íslenskum krónum. Þetta var meðal þess sem kom fram í erindi Más á ráðstefnu sem Landsbankinn stóð fyrir á fimmtudag undir yfirskriftinni „Staðan á Íslandi – fjármálastöðugleiki“.

Gerði Már gjaldeyrishöftin að umtalsefni og sagði það mikilvægt til lengri tíma litið að afnema höftin sem séu skaðleg. Már bætti þó við að áður en til almennrar losunar kæmi þyrfti að huga að nýjum ramma utan um peningastefnuna sem og almenna efnahagsstjórn á Íslandi. Þá væri æskilegt að lögfesta ákveðnar þjóðhagsvarúðarreglur með það fyrir augum að auka stöðugleika í hagkerfinu.

Talaði Már meðal annars um að minnka þyrfti áhættu þjóðarbúsins vegna fjármagnshreyfinga og bankastarfsemi yfir landamæri. Taldi hann því næst upp sex varúðarreglur sem skynsamlegt gæti verið að lögfesta á Íslandi þar á meðal tvær reglur er varða starfsemi innlendra banka erlendis. Annars vegar að takmarkanir yrðu settar á slíka starfsemi sem gæti kallað á ábyrgð íslenskra skattborgara og hins vegar að innstæðutryggingar yrðu aðeins greiddar út í krónum.

Steingrímur J. Sigfússon, efnahags- og viðskiptaráðherra, er sammála Má um að þessi atriði þurfi að skoða vandlega. Varðandi innstæðutryggingar segist hann taka undir með Má að æskilegt sé að lögfesta að innstæðutryggingar verði aðeins greiddar út í krónum en bendir á að Íslendingar eru þó í þessum málaflokki bundnir af evrópsku lagaverki.

Þá segir hann að fara þurfi vel yfir hvort ástæða sé til að takmarka lánveitingar í erlendri mynt. Nauðsynlegt sé að læra af reynslu síðustu ára og vonandi sé hægt að tryggja að fjármálakerfið verði heilbrigðara í framtíðinni með löggjöf og í framkvæmd. Loks segir hann enn mikla vinnu bíða á þessu sviði.

magnusl@frettabladid.is