Loðnan mokveiðist uppi í harða landi

Loðnuflotinn var í gær í mokveiði utan við Grindavík. Stór köst fengust um morguninn úr stærstu torfunni við Reykjanesið. Yfir 400 þúsund tonn eru þegar komin á land og hrognataka og frysting hefst í vikunni.

„Það var mokveiði hérna úti af Grindavík í morgun. Mikið að sjá og stórar torfur,? segir Ólafur Einarsson, skipstjóri á Álsey VE 2, í viðtali við Fréttablaðið. ?Við fylltum í fjórum köstum. Við köstuðum tvisvar á útleiðinni, ekki langt frá Eyjum. Við fylltum síðan í tveimur köstum í morgun,“ segir Ólafur en Álsey tekur um 1.700 tonn. Þegar Álsey var við veiðar voru fimm önnur skip við veiðar.

Álsey landar á Þórshöfn, en siglingin norður á Langanes er yfir 400 mílur. Ólafur segir að það sé ekki óskastaðan að sigla með aflann svo langa leið. Tafir verða frá veiðum í nokkra sólarhringa en þó sé nauðsynlegt að dreifa aflanum á milli starfsstöðva Ísfélagsins.

Ólafur telur að um þrjár vikur séu eftir af vertíðinni, ekki sé ólíklegt að loðnan verði veiðanleg fram undir 20. mars. Því telur Ólafur að það verði vandkvæðalaust að ná kvótanum, að því gefnu að friður verði fyrir veðri.

Á heimasíðu Fiskistofu kemur fram að 383 þúsund tonn séu komin á land af 590 þúsund tonna kvóta, eða um 65 prósent af kvótanum. Það þýðir í raun að veiðin er þegar orðin vel rúmlega 400 þúsund tonn þar sem veiðin er alltaf lítillega vanskráð í veiðum sem ganga hratt fyrir sig.

Ólafur segir mikið að sjá af loðnu, þó aðalgangan sé úti af Grindavík. „Það er alltaf eitthvað að sjá hérna austar. Þetta lítur vel út,“ segir Ólafur. Eins og greint hefur verið frá er þess vænst að útflutningsverðmæti í loðnu losi 30 milljarða króna.

svavar@frettabladid.is