Nú þarf að bíða eftir hlákunni

Mokað hefur verið burt snjóhraukum sem talið var að hætta stafaði af í Reykjavík. Hraukarnir hafa hlaðist upp í snjómokstri borgarinnar síðustu vikur.

„Við tókum nokkra en erum hættir,“ segir Guðni J. Hannesson, yfirverkstjóri hjá framkvæmda- og eignasviði Reykjavíkurborgar. „Nú þarf bara að bíða eftir að þetta hláni.“

Guðni segir að fjarlægðir hafi verið hraukar sem talið var að gætu skapað hættu, svo sem þar sem skyggði á umferð. Hann segir nokkuð um að kvartað sé undan snjóhraukunum sem sums staðar taki pláss á bílastæðum og gangstígum. Hins vegar sé það ekki svo nú að börnum geti stafað hætta af því að leika sér í hraukunum. „Það er orðin svo hörð skel á þessu að þau geta ekki grafið sig inn í þá.“- óká