Einstök ákvæði stjórnarskrár borin undir þjóðaratkvæði

Einstök álitaefni nýrrar stjórnarskrár verða borin undir þjóðina í atkvæðagreiðslu samhliða forsetakosningum í júní. Að þessu er unnið innan stjórnskipunar- og eftirlitsnefndar Alþingis. Ekki er talið að það náist að fullvinna stjórnarskrárfrumvarp sem lagt verði fyrir þjóðina í sumar.

Álfheiður Ingadóttir, fyrsti varaformaður nefndarinnar, segir að unnið sé eftir þeim línum að gott væri að fá viðhorf þjóðarinnar til mikilvægustu greina stjórnarskrárinnar. Með því mætti fá fram stóru línurnar í málinu. „Það er sú formúla sem við erum að vinna eftir núna. Við erum að skoða hvaða stóru mál þetta eru."

Róbert Marshall, annar varaformaður nefndarinnar, tekur undir þetta. Hann var meðflutningsmaður að tillögu sem gerði ráð fyrir því að frumvarp yrði borið undir þjóðaratkvæði í júní, samhliða forsetakosningum ef af þeim yrði.

„Eftir því sem vinnunni hefur undið fram í nefndinni hefur mér sýnst að það borgi sig að leggja fram nokkrar spurningar út úr skjalinu þar sem þjóðin er beðin að taka afstöðu til forsetaembættisins, ríkis og kirkju, auðlindaákvæðis og svo framvegis."

Birgir Ármannsson, fulltrúi Sjálfstæðisflokksins í nefndinni, segir óraunhæft að hægt sé að leggja málið í þjóðaratkvæðagreiðslu í sumar. Hann segir margt óljóst í sambandi við það hvað meirihlutinn ætli sér með málið. Sérfræðingar sem fyrir nefndina hafi komið hafi hins vegar verið á einu máli.

„Mér er óhætt að segja að það er samdóma álit þeirra sérfræðinga sem til okkar hafa komið, hvort sem um hefur verið að ræða lögfræðinga sem hafa sérhæft sig í stjórnlagarétti eða menn úr stjórnmálafræðigeiranum, að þessar tillögur þurfi mun meiri vinnu til að hægt sé að líta á þær sem endanlegt plagg," segir Birgir.

Róbert Marshall vill að nefndin vinni úr niðurstöðum slíkrar atkvæðagreiðslu og skili síðan fullbúnu frumvarpi í vetrarbyrjun. Þau Álfheiður segja það fullan vilja ríkisstjórnarinnar að klára málið á kjörtímabilinu. -kóp