Tvö fyrirtæki nota Skráargatið

Að minnsta kosti tvö matvælafyrirtæki hér á landi hafa ákveðið að taka upp hollustumerkið Skráargatið á völdum vörum. Þó er ekki búið að innleiða merkið formlega hér á landi.

Skráargatið sést á umbúðum nýs skyrdrykkjar frá Mjólkursamsölunni og á morgunkorninu Bygga, frá matvælafyrirtækinu Árla. Í Skandinavíu hefur merkið verið notað í fjölda ára, en vörur þurfa að uppfylla ströng innihaldsskilyrði til að leyfilegt sé að nota það á umbúðunum.

Atvinnuveganefnd Alþingis lagði til á fimmtudag að þingsályktunartillaga um Skráargatið verði samþykkt. Í því felst að sjávarútvegs- og landbúnaðarráðherra beiti sér fyrir því að hægt sé að taka upp merkið við íslenska matvælaframleiðslu.

Neytendasamtökin hafa lengi beitt sér fyrir því að merkið verði innleitt hingað til lands. Brynhildur Pétursdóttir, ritstjóri Neytendablaðsins, furðar sig þó á því að fyrirtæki séu nú þegar farin að markaðssetja vörur sínar með Skráargatinu, sér í lagi þar sem umsagnir Samtaka atvinnulífsins og Samtaka iðnaðarins fólu í sér töluverða gagnrýni á innleiðingu merkisins. -sv