18 króna hækkun á árinu

Frá áramótum hefur verð á bensíni hækkað um sem nemur 18 krónum. Hækkun undanfarinna tveggja daga er nálægt fjórum krónum. N1 reið á vaðið í fyrradag með hækkun úr 242,7 krónum á lítrann í 246,7 krónur. Í gær fylgdu svo hækkanir á öllum öðrum bensínstöðvum.

Runólfur Ólafsson, framkvæmdastjóri Félags íslenskra bifreiðaeigenda, telur að hækkanirnar nú ráðist að nokkru af hækkun heimsmarkaðsverðs. „Fyrir helgi hækkaði bensín út af alls konar spákaupmennsku,“ segir hann, en óvissa um þróun mála hvað varðar eldsneytiskaup Evrópusambandslanda á olíu frá Íran hefur aukið óróleika á markaði sem leitt hefur til hækkana.

Hækkanir á opinberum gjöldum hér innanlands um áramót hefur að auki tekið að hafa áhrif hjá olíufélögum. „Þær hafa komið til framkvæmda með nýjum birgðum,“ segir Runólfur. Síðustu hækkanir hafi verið um þremur krónum minni í Danmörku, þrátt fyrir svipaða gengisþróun gagnvart dollar og að teknu tilliti til skattahækkana hér. „Það virðist vera í þessu tilhneiging til að auka aðeins við í álagningu.“

Eldsneytisverð hefur hækkað hratt frá hruni krónunnar 2008. Runólfur bendir á að þegar krónan hrundi hafi komið neytendum hér til góða að olíuverð á erlendum mörkuðum hafi lækkað vegna samdráttar í efnahagslífi heimsins.

Til þess að setja verðbreytingar síðustu ára í samhengi má líta til þess að árið 1990 kostaði tæpar 2.700 krónur að fylla 50 lítra bensíntank. Á tankinum komst bíll sem eyðir 10 lítrum á hundraðið frá Reykjavík austur að Hvalnesvita (rúma 40 kílómetra austur fyrir Höfn í Hornafirði). Núna fást tæpir 11 lítrar af bensíni fyrir sömu upphæð og skila ökumanninum austur á Hvolsvöll.

Bensínverð hefur sem sagt hækkað um 367 prósent en þó ber að hafa í huga að almennt verðlag hefur hækkað um 178 prósent frá 1990. - óká