Norræn bros í þrot með tannígræðslur

Tannlæknastofunni Nordic Smile var lokað eftir fárra mánaða rekstur. Leita fjárfesta og stefna að því að opna á ný. Samningaviðræður standa yfir við Höfðatorg vegna ógreiddrar leigu. Seljandi tannlæknastóla bjargaði sér fyrir horn.

Loka varð tannlæknastofunni Nordic Smile á Höfðatorgi í lok júlí í fyrra þar sem erlendir fjárfestar brugðust. Stofan hafði þá aðeins verið rekin í nokkra mánuði. Reyna á að opna Nordic Smile á ný, að sögn dr. Ólafs Ólafssonar, talsmanns fyrirtækisins.

Í nefndaráliti frá því í júní um lækningar yfir landamæri, sem birt var á heimasíðu velferðarráðuneytisins, sagði að með nýrri tækni gæti Nordic Smile boðið tannígræðsluþjónustu sína á verði sem væri um 30 prósent af verðinu í Bretlandi og Bandaríkjunum. Markhópur fyrirtækisins væri alþjóðlegur en gera mætti ráð fyrir að það yrðu aðallega Bretar og Bandaríkjamenn sem nýttu sér þjónustuna til að byrja með. Þar sagði jafnframt: „Fólk hér á landi mun einnig geta nýtt sér þjónustu fyrirtækisins.“

Þegar stofunni var lokað í fyrrasumar voru nokkrir íslenskir viðskiptavinir fyrirtækisins með ókláraða tannígræðslu. „Þeim var vísað á íslenska tannlækna sem höfðu starfað á Nordic Smile ásamt sænsku tannlæknunum tveimur sem þar störfuðu. Þetta voru tannlæknar sem voru með eigin stofur annars staðar,“ segir Ólafur.

Tíu tannlæknastólar voru settir upp á áttundu hæð í turninum á Höfðatorgi auk annarra tannlækningatækja. Þar sem ekkert fjármagn var í Nordic Smile var ekki hægt að greiða seljandanum.

„Við gátum selt íslenskum tannlæknum stólana. Með því að kaupa þá var okkar fyrirtæki bjargað fyrir horn,“ segir Hrafnhildur Sigþórsdóttir, skrifstofustjóri Tannhjóls ehf.

Nordic Smile leigði hjá Höfðatorgi en stóð ekki í skilum með húsaleigu.

„Við erum með nokkrar kröfur á þá. Við höfum átt ágætis samstarf við þetta fólk og stefnan hjá þeim er að gera upp. Ég held að þeir ætli að reyna að opna aftur. Við erum allavega í þannig viðræðum við þá,“ segir Pétur Guðmundsson, fulltrúi Höfðatorgs.

Ólafur segir reynt að róa öllum árum að því að fá fjárfesta til þess að fyrirtækið verði ekki sett í gjaldþrot.

„Það á að reyna að opna aftur. Þetta er mjög spennandi verkefni og áhugavert fyrir ferðaþjónustuna. Það er gert ráð fyrir að ef starfsemin væri á fullu gætu viðskiptavinir verið um 300 á mánuði.“ ibs@frettabladid.is