Bjóða Oddnýju til opins fundar á ný

Foreldrar barna í Hamraskóla í Grafarvogi hafa ítrekað boð til Oddnýjar Sturludóttur, formanns skóla- og frístundaráðs Reykjavíkurborgar, um að mæta á opinn fund í skólanum og ræða fyrirhugaðar breytingar á skólastarfi. Fundurinn er áætlaður á fimmtudaginn eftir viku.

Foreldrarnir, sem eru margir hverjir óánægðir með fyrirhugaðan flutning unglingadeildar Hamraskóla yfir í Foldaskóla, hafa gagnrýnt Oddnýju fyrir að hafna slíku fundarboði og fulltrúi Sjálfstæðisflokksins í ráðinu lét bóka á fundi þess að fáheyrt væri að kjörinn fulltrúi neitaði að eiga samráð við þá sem ættu hagsmuna að gæta.

Oddný sagði í Fréttablaðinu í gær að þetta væri misskilningur. Boðað hefði verið til fundarins einhliða og hún í staðinn boðið foreldrunum til fundar við sig. Þegar hefði verið haldinn opinn fundur um málið.

Marta Kristín Hreiðarsdóttir, einn talsmanna foreldranna, er óánægð með þessi viðbrögð Oddnýjar. Hún bendir á að enginn kjörinn fulltrúi hafi verið á opna fundinum í desember.

Í tölvupósti frá Oddnýju til eins talsmannanna segir að hún telji ekki þörf á opnum fundi um málið, en því eru foreldrarnir ósammála og hafa því boðað annan slíkan fund og vonast eftir þátttöku kjörinna fulltrúa.

- sh