Fréttaskýring: Ágreiningur um öll grundvallaratriðin

Rökræður forsvarsmanna fjórflokksins um sjávarútvegsmál í gær staðfestu að breytingar á stjórn fiskveiða verður stærsta og erfiðasta mál Alþingis í vetur.

Rökræður forsvarsmanna fjórflokksins um sjávarútvegsmál í gær gáfu ekki vonir um að breytingar á lögum um stjórn fiskveiða komi til með að verða í öðrum farvegi en hingað til. Sátt er um fátt, ef nokkuð, af því sem þarf að leiða til lykta á næstu vikum og mánuðum.

Þau Bjarni Benediktsson, formaður Sjálfstæðisflokksins, Ólína Þorvarðardóttir, þingmaður Samfylkingarinnar, Björn Valur Gíslason, þingmaður Vinstri grænna, og Gunnar Bragi Sveinsson, þingmaður Framsóknarflokksins, mættust í gær í boði Iceland Seafood International sem stóð fyrir markaðsdegi 2012. Steingrímur J. Sigfússon, sjávarútvegs- og landbúnaðarráðherra afboðaði komu sína og það gerði líka Sigmundur Davíð Gunnlaugsson, formaður Framsóknarflokksins.

Fyrst af öllu voru fjórmenningarnir ekki sammála um hversu stór áskorun það er að breyta lögum um stjórn fiskveiða. Bjarni fullyrti að ríkisstjórnin hafi ekki sýnt fram á hvað það sé sem þarf að laga. Ef svo væri þá væri málið úr sögunni. Ólína benti Bjarna á þá miklu byggðaröskun sem hefur orðið í landinu eftir að kvótakerfið komst á. „Það er stórkostlega mikið að,“ sagði Ólína enda fælist í kerfinu skerðing á jafnræðisreglu stjórnarskrárinnar og atvinnufrelsissjónarmiðum, svo fátt sé talið.

Á sumt var hægt að festa fingur. Um lengd nýtingarsamninga sagði Ólína að 15 til 20 ár væri viðmiðið, enda segði í stjórnarsáttmála að stefnt væri að því að breyta kerfinu á þeim tíma. Bjarni taldi eðlilegt að miða við 25 ár, að vissum forsendum gefnum. Björn Valur sagði þetta ráðast af mörgum þáttum; rekstrarskilyrðum, möguleikum til fjármögnunar og eðlilegum tíma til afskrifta. Í því ljósi taldi hann eðlilegt að tala um 15 til 25 ár. Gunnar Bragi, sem nefndi 20 til 30 ár, lýsti því yfir að í þessu atriði kristallaðist óþolandi óvissa um framtíð greinarinnar. Hann sagði að umræðan, án þess að nefna nöfn, væri í þeim anda að í sjávarútvegi væru „tómir svikahrappar.“ Hann taldi, spurður af Ólínu, að starfsskilyrði og leikreglur í greininni hafi ekki verið með óeðlilegum hætti eftir að kvótakerfið komst á.

Um veiðigjaldið spannst nokkur umræða. Bjarni taldi sýnt að ef samningaleið verður farin þá falli það gjald niður enda verði greitt fyrir samninga á milli útgerða og ríkis. Hins vegar sagði hann það vera marklaust að tala um sjávarútvegsmál á þeim nótum að framsal og veðsetning yrðu bönnuð.svavar@frettabladid.is