Viðbrögð við dómi Hæstaréttar

Efnahags- og viðskiptanefnd Alþingis fundaði nú klukkan fimm vegna niðurstöðu Hæstaréttar. Á fundinn voru kallaðir fulltrúar Seðlabanka, Fjármálaeftirlitsins og Efnahags- og viðskiptaráðuneytisins en Helgi Hjörvar formaður nefndarinnar hafði fyrir mánuði síðan óskað eftir að þessar stofnanir myndu reikna út áhrif þess að dómurinn félli á þennan veg.

„Það er ljóst að umtalsverður fjöldi skuldara mun fá nokkra leiðréttingu á sínum skuldum, þeim til hagsbóta og ég held að það sé ánægjulegt. Það mun auðvitað jafnframt hafa í för með sér nokkuð tjón fyrir fjármálakerfið og fjármálaeftirlitið telur það hlaupa á nokkrum tugum milljarða, eigið fé bankakerfisins hins vegar hleypur á mörg hundruð milljörðum þannig að viðskiptabankarnir eiga að geta tekist á við þetta," sagði Jóhanna Margrét Gísladóttir.

Framundan séu útreikningar á hverjar afleiðingarnar verða fyrir bankakerfið og heimilin og kappkostað verði við að gera það næstu sólarhringa.

„Ég held það sé auðvitað áfall fyrir Alþingi að hafa sett lög sem að ekki halda í Hæstarétti en það verður þá að benda á að dómurinn fellur 4-3 svo það er augljóst að um mikið álitaefni var að ræða," sagði Helgi Hjörvar, formaður efnahags- og viðskiptanefndar.

Stjórnarandstaðan segir dóminn vera áfall fyrir ríkisstjórnina.

„Dómurinn staðfestir, fullkomið klúður ríkisstjórnarinnar við gerð laga nr. 51/2010 sem voru samþykkt með miklum hraða í lok árs 2010," segir Guðlaugur Þór Þórðarson Sjálfstæðisflokki.

„Við vöruðum við því þegar málið var keyrt í gegnum þingið að um afturvirkni var að ræða að miða við vexti Seðlabankans oen ekki samningsvexti. Nú er það að koma á daginn og þetta virðist koma ríkisstjórninni, seðlabankanum og fjármálaeftirlitinu algjörlega á óvart," sagði Birkir Jón Jónsson, þingmaður Framsóknarflokksins.

Í samtali við fréttastofu sögðu talsmenn stóru viðskiptabankanna þriggja að verið væri að fara yfir dóminn og þýðingu hans . Enginn vildi tjá sig að svo stöddu en ljóst er að dómurinn mun hafa víðtæk áhrif á bankana og gera það að verkum að endurreikna þarf öll gengistryggð lán aftur.