Rauðir hundar greinast hér á landi

Á síðustu 1-2 vikum hafa tveir fullorðnir einstaklingar greinst með rauða hunda hér á landi. Í tilkynningu frá Landlækni segir að báðir hafi þeir verið með einkennandi sjúkdóm og höfðu ekki verið bólusettir sem börn eða unglingar. Annar einstaklinganna hafði líklega smitast erlendis. Landlæknir segir þó ekki ástæðu til þess að hefja fjöldabólusetningu unglinga eða fullorðinna gegn sjúkdómnum að svo stöddu. Sjúkdómurinn greindist síðast hér á landi árið 1992.

Að sögn Landlæknis eru Rauðir hundar yfirleitt vægur sjúkdómur hjá heilbrigðu fólki en „getur valdið alvarlegum fósturskaða hjá þunguðum konum, einkum á fyrri hluta meðgöngu. Rauðir hundar greindust síðast á Íslandí árið 1992."

Hér á landi hefur verið bólusett gegn rauðum hundum frá 1977 hjá konum á barneignaaldri sem ekki höfðu mótefni gegn veirunni en því fyrirkomulagi var hætt 2001. „Almenn bólusetning allra 18 mánaða barna hófst 1989 með notkun samsetts bóluefnis gegn mislingum, hettusótt og rauðum hundum (MMR). Endurbólusetning með þessu bóluefni hjá 9 ára börnum hófst síðan 1997, en árið 2001 var aldur endurbólusetningarinnar hækkaður í 12 ár."

Í tilkynningu Landlæknis segir að greining rauðra hunda í dag minni á að bólusetningasjúkdómar geti stungið sér niður hér á landi hjá óbólusettum einstaklingum. „Þar sem búast má við að hér á landi sé stór hópur fullorðinna karlmanna sem hvorki hefur verið bólusettur gegn rauðum hundum né fengið sjúkdóminn er ekki ólíklegt að fleiri fullorðnir karlmenn muni greinast með sjúkdóminn á næstunni."

Þá segir að ólíklegt sé að bólusett börn fái rauða hunda og sömuleiðis er talið ólíklegt að þungaðar konur smitist af rauðum hundum þar sem fylgst hefur verið með mótefnum allra unglingsstúlkna síðan 1977.

„Þó að hér á landi hafi nú greinst rauðir hundar er engin ástæða til þess að hefja fjöldabólusetningu unglinga eða fullorðinna gegn sjúkdómnum að svo stöddu. Foreldrar eru hins vegar áfram hvattir til að láta bólusetja börn sín með þeim bóluefnum sem boðið er upp á í almennum bólusetningum."