Nota nætursjónauka við leitina - þyrlan gæti verið kölluð út

Unglingspiltarnir tveir sem struku af meðferðarheimili í Skagafirði síðdegis í dag eru ófundir en um fimmtíu björgunarsveitarmenn leita þeirra nú í Svartárdal, inn af Húnaveri. Björgunarsveitarmenn eru á fjórhjólum og bílum en ef þeir finnast ekki á næstu klukkutímum gæti þurft að kalla út þyrlu Landhelgisgæslunnar til aðstoðar.

Samkvæmt upplýsingum frá Landsbjörg eru björgunarsveitarmenn með nætursjónauka við leitina. Töluvert af sumarhúsum eru í Svartárdal og eru björgunarsveitarmenn meðal annars að skoða hvort piltarnir haldi til í þeim. Það er þokkalegt veður á svæðinu en hitinn er kominn undir frostmark. Drengirnir eru illa klæddir og það gæti verið hættulegt fyrir þá að vera úti í þessum kulda.

Leitað verður þar til piltarnir finnast, og þess vegna í alla nótt ef þess þarf. Þrír piltar struku af meðferðarheimili í Skagafirði í dag, einn af drengjunum gaf sig fram um klukkan átta í kvöld en hinir tveir héldu áfram út í myrkrið.