Sýslumenn svara HH fullum hálsi

Stjórn Sýslumannafélags Íslands hefur sent frá sér yfirlýsingu þar sem fullyrðingum Hagsmunasamtaka heimilanna frá því í gær er svarað. Samtökin sögðu í gær að í ljósi nýgengins Hæstaréttardóms um ólögmæti vaxtaútreikninga gengistryggðra lána, hefðu sýslumenn sem framkvæmt hafa fjárnám, nauðungarsölur og gjaldþrotaúrskurði „á grundvelli slíkra ólögmætra útreikninga" tekið sér dómsvald á meðan réttaróvissa ríkti. „þar með hafi þeir brotið stjórnsýslulög og jafnvel stjórnarskrá."

Þórólfur Halldórsson, formaður Sýslumannafélags Íslands, bendir meðal annars á í yfirlýsingunni, sem lesa má í heild sinni hér að neðan, að héraðsdómstólar kveði upp gjaldþrotaúrskurði, en ekki sýslumenn. Um nauðungarsölur og fjárnám fari síðan samkvæmt lögum þar um.

„Fullyrðingar HH um að sýslumenn hafi í störfum sínum við nauðungarsölur og fjárnám brotið stjórnsýslulög jafnvel stjórnarskrá eru auðvitað mjög alvarlegar," segir Þórólfur að lokum. „Samtök sem hafa jafn mikilvægu hlutverki að gegna og HH þurfa að beita traustum og yfirveguðum rökstuðningi í sínum málflutningi. Að ásaka heila stétt embættismanna um lögbrot með upphrópunum og órökstuddum fullyrðingum er ekki málstað samtakanna til framdráttar."