Reyndi að smygla stinningarlyfinu Kamagra til landsins

Rúmlega fimmtugur maður var dæmdur í Héraðsdómi Reykjavíkur í morgun fyrir tollalagabrot þegar hann kom hingað til lands með skipinu Arnarfelli, þar sem hann er bátsmaður, aðfaranótt miðvikudagsins 9. febrúar 2011.

Hann reyndist vera með 60 lítra af Fjorda vodka, 12 lítra af Blomer vodka, 9 lítra af rauðvíni, 3.600 stykki af Winston vindlingum og 400 grömm af píputóbaki, án þess að gera tollgæslunni grein fyrir varningnum, en tollverðir fundu hann við tollskoðun. Maðurinn játaði brot sín skýlaust.

Maðurinn hefur áður gerst sekur vegna tollalagabrota. Hann var dæmdur í 60 daga fangelsi en refsingin fellur niður haldi maðurinn skilorð í tvö ár.

Í síðustu viku var annar skipverji einnig dæmdur fyrir að smygla áfengi og tóbaki til landsins með sama skipi og í sömu ferð. Þá reyndist hann einnig vera með stinningarlyfið kamagra í fórum sínum. Sá var dæmdur í þriggja mánaða skilorðsbundið fangelsi en refsingu frestað haldi hann skilorð í tvö ár.