Ilmvatn unnið úr vatni við Heklurætur

„Ilmvatnið er kennt við drottningu íslenskra eldfjalla og unnið úr vatni sem rennur undan Heklurótum í Ytri-Rangá,“ segir Sigrún Lilja Guðjónsdóttir um nýja ilmvatnið Heklu frá Gyðju.

Hekla er þriðja ilmvatnið frá Gyðju og annar dömuilmurinn. Ilmvötn Gyðju eru þróuð og framleidd í borginni Grasse í Frakklandi en vinna við Heklu hófst fyrir ári síðan. Öll ilmvötn úr Gyðju-línunni eru innblásin af íslenskri náttúru, EFJ Eyjafjallajökull og herrailmurinn VJK Vatnajökull.

„Það er flókið ferli að búa til ilmvatn og þar sem við notuðum íslenska náttúru flækti það ferlið töluvert. En við vorum í náinni samvinnu við ilmvatnshönnuð í Frakklandi sem gjarna er nefndur „nefið“ þar í landi,“ segir Sigrún ánægð með útkomuna.

Sigrún segir mikla vinnu liggja að baki umbúðunum sem meðal annars sýna Heklugos og hangir lyklakippa með hraunmola á hverju glasi. Ilmurinn er væntanlegur í verslanir á næstu dögum.