Ljúka reisunni á mölinni

Stefán Hilmarsson og Eyjólfur Kristjánsson, Stebbi & Eyfi, ljúka reisu sinni um landið með tónleikum í Salnum í Kópavogi föstudagskvöldið næsta, 30. nóvember. Þeim til fulltingis verður píanóleikarinn og Kópavogsbúinn Þórir Úlfarsson.

Reisan hófst í vor til að fylgja eftir útkomu geisladisksins Fleiri notalegar ábreiður sem Stebbi & Eyfi gáfu út fyrir síðustu jól. Áður höfðu þeir sent frá sér plötuna Nokkrar notalegar ábreiður.

Ásamt því að flytja lög af ábreiðuplötunum munu Stebbi og Eyfi flytja mörg af vinsælustu lögunum sem þeir félagar hafa sent frá sér í gegnum tíðina, ýmist saman eða hvor í sínu lagi.