Fyrri stofnfundur Breiðfylkingarinnar haldinn í dag

Í dag var haldinn stofnfundur Breiðfylkingarinnar sem fulltrúar Hreyfingarinnar, Frjálslynda flokksins og fleiri aðila standa að. Margrét Tryggvadóttir, þingmaður Hreyfingarinnar, segir nú hópinn kanna hvort hægt verði að hefja samstarf undir formerkjum nýs stjórnmálaafls.

Breiðfylkingin á að verða nýr samstarfsvettvangur um framboð til næstu Alþingiskosninga. Stofnfundir hennar eiga að vera tveir en sá fyrri var haldinn í dag. Þá á málefnavinna að taka við í nefndum sem eiga að leggja fram drög að málefnaskrá fyrir seinni stofnfundinn.

„Já þetta virkar þá þannig að framhaldsstofnfundur samþykki umsóknir annara hreyfinga og stjórnmálahreyfinga að fylkingunni. Ef þetta fer allt vel af stað og samstaða næst um málefnin mun Hreyfingin væntanlega sækja um aðild að þessum stjórnmálasamtökum. Hún mun hins vegar halda áfram að vera til og ekkert ákveðið um hvernig þetta endar allt saman," segir Margrét Tryggvadóttir þingmaður Hreyfingarinnar.

Helsta deilumál fylkingarinnar virðist þó vera Evrópusambandið. Margrét segist ekki vita hvort félagarnir nái saman í því máli.

„Nú er verið að rífast um ESB svo ég er ekkert sérlega bjartsýn," segir Margrét og hlær en bætir við að í ljós verði að koma hvort sátt náist um málið. ,,Tillagan sem við settum fram snýst um að við værum ósammála og hefðum hvert okkar skoðun. Lýðræðið ætti að ráða, fólk fengi upplýsingar og þjóðin muni ráða þessu."

Margrét segir Hreyfinguna vilja halda áfram sinni vinnu með Breiðfylkingunni. „Það er svona tilraun sem við erum að gera núna. Að sjá hvort við getum unnið með fleiri Hreyfingum og einstaklingum sem hafa látið samfélagið sig varða."