Margir kannað stöðu barnasparnaðar

 „Við höfum fengið mikil og jákvæð viðbrögð við þessari frétt. Fjöldi fólks hefur haft samband og spjallað við okkur um þetta í kjölfarið,“ segir Björn Berg Gunnarsson, fræðslustjóri VÍB, eignastýringarþjónustu Íslandsbanka.

Þar vísar Björn til umfjöllunar sem birtist í Fréttablaðinu í byrjun febrúar þar sem fjallað var um valmöguleika fólks þegar kemur að sparnaði barna. Í fréttinni benti Björn á að skynsamlegra gæti verið að geyma sparnað barna í verðbréfasjóðum, til dæmis ríkisskuldabréfasjóðum, fremur en á bankabók. Þannig mætti auka vaxtavexti og minnka greiddan fjármagnstekjuskatt.

Björn segist ekki vera í aðstöðu til að sjá hvort margir hafi beinlínis flutt sparnað sinn en segir þó ljóst að margir hafi farið að velta þessum hlutum fyrir sér í kjölfarið.

„Sumir vildu spjalla við okkur um skynsamlegustu sparnaðarleiðirnar. Aðrir vildu kanna hvar sparnaður barna þeirra væri geymdur og enn aðrir vildu ganga úr skugga um að hann væri alveg örugglega í ríkisskuldabréfasjóðum,“ segir Björn.

Hann segir mikilvægt að skoða vel þá valmöguleika sem séu til staðar þegar sparað sé til langs tíma. Lítill vaxtamunur og áhrif skatta geti þá breytt miklu.

- mþl