Dýrasti hamborgari heims mun ekki kom í veg fyrir hungursneyð

„Þetta er meira gert til skemmtunar og til þess að sækja nýja þekkingu frekar en til þess að fæða okkur," segir Kári Stefánsson, forstjóri Íslenskrar erfðagreiningar í viðtali við Reykjavík síðdegis á Bylgjunni í dag, um dýrasta hamborgara heims, sem hollenskir vísindamenn bjuggu til á dögunum.

Borgarinn kostar 250 þúsund evrur eða um 41 milljón krónur. Ástæðan er sú að kjötið er ræktað á tilraunastofu.

Vísindamenn við háskólann í Maastricht í Hollandi ræktuðu nokkur hundruð kjötbita í tilraunaglösum og notuðu til þess stofnfrumur úr kýrvöðva. Eins og verðið gefur til kynna, þá gengur ræktunin hægt fyrir sig og er einstaklega dýr.

Í viðtali við Reykjavík síðdegis sagði Kári að matarræktun væri ekki ný af nálinni. Það var hinsvegar nýtt að vísindamenn notuðu stofnfrumur til ræktunarinnar en ekki vefi.

Hann segir vandamálið þó sama og með vefina, þetta sé bæði dýrt og tímafrekt. Það sé því ekki búið að leysa hungursneyð í þriðja heiminum. Hann sagði ennfremur að bragðið af slíku kjöti væri sennilega heldur sérkennilegt.

Hægt er að hlusta á fróðlegt viðtal við Kára í Reykjavík síðdegis með því að smella á hlekkinn hér.