Fjögurhundruð milljörðum velt yfir á almenning

400 milljörðum hefur verið velt yfir á heimilin frá hruni vegna verðtryggingarinnar, segir Ólafur Ísleifsson. Hann lýsti skoðunum sínum á verðtryggingunni í samtali við Reykjavík síðdegis á Bylgjunni í dag.

„Við sjáum það að fyrir tilstilli verðtryggingarinnar hefur 400 milljörðum verið velt yfir á heimilin á tímabilinu frá hruni. Hvaðan eiga heimilin að taka þessa peninga á sama tíma og tekjur hafa verið að dragast saman, þegar atvinnuleysi hefur verið hér sem aldrei fyrr, fólk að flýja land og svo framvegis," segir Ólafur. Við þetta hafi síðan bæst skattahækkanir til að brúa fjárlagagatið og greiða vexti. Og þær skattahækkanir nýtist ekki til að bæta heilbrigðiskerfið, skólana eða almannatryggingakerfið.

Þá bendir Ólafur á að verðtryggingin felur í sér að við erum með tvær myntir í landinu. „Annars vegar myntin sem við fáum launin okkar borguð í og svo er það þessi verðtryggða króna. Þeir sem eru með verðtryggð lán eru með lánaskuldbindingar í annarri mynt en þeir afla tekna. Að því leytinu til er þetta ekkert frábrugðið því og að vera með erlent lán," segir hann.