Dýfði sér og fékk glóðarauga

"Ég er rosalega lítill sundmaður. Ég eiginlega þoli ekki sundlaugar en hvað gerir maður ekki fyrir gott málefni?" segir popparinn Friðrik Dór.

Dýfingakeppni var haldin í Sundhöll Reykjavíkur í tilefni af Degi rauða nefsins sem er haldinn af UNICEF, Barnahjálp Sameinuðu þjóðanna. Þar lögðu þekktir Íslendingar sig fram fyrir gott málefni, þar á meðal Friðrik Dór, sem nýlega gaf út plötuna Vélrænn. Hann tók nokkuð sérstæða dýfu sem endaði með því að hann lenti illa og hlaut glóðarauga að launum. "Ég held ég hafi farið í eitt og hálft heljarstökk. Ég var kominn hálfan aukahring þegar andlitið skall á vatninu. Þetta var ansi döpur frammistaða."

Þrátt fyrir meiðslin segist hann geta hugsað sér að prófa dýfingarnar aftur. "Þetta var mjög skemmtilegt. Það er spurning um að leggja þetta fyrir sig og reyna að "mastera" heljarstökkið."

Meðal annarra þátttakenda voru Sveppi, leikkonan María Birta Bjarnadóttir, Þórunn Antonía, Halldór Gylfason og Ebba Guðný Guðmundsdóttir. Sveppi varð fyrir því óhappi að sundhettan hans rifnaði í tvennt rétt áður en hann fór upp á dýfingabrettið. Hann lét það ekki á sig fá og flaug myndarlega út af brettinu. María Birta meiddist lítillega og uppskar marblett á læri eftir sína lendingu.

Dómnefndina skipuðu þau Ilmur Kristjánsdóttir, útvarpskonan Gunna Dís og Jónas Tryggvason, sem er reyndur dýfingadómari.

Dýfurnar verða sýndar í söfnunar- og skemmtiþætti á Stöð 2 á föstudaginn á Degi rauða nefsins. Þá kemur í ljós hver bar sigur úr býtum í keppninni. Hér fyrir neðan er hægt að sjá fleiri myndir af dýfingum Friðriks Dórs, Þórunnar Antoníu, Sveppa og Halldórs Gylfasonar.