Hægt verði að afgreiða málið fyrir aðalmeðferð

Formaður þingnefndar sem á að fjalla um tillögu um að afturkalla ákærur á hendur Geir H. Haarde vonast til að Alþingi verði búið að afgreiða málið áður en aðalmeðferð hefst í málinu í mars. Málið verður líklega tekið fram fyrir önnur mál í nefndinni.

Meirihluti þingmanna hafnaði því í gærkvöldi að vísa frá tillögu Bjarna Benediktssonar um að afturkalla ákærur á hendur Geir H. Haarde. Þetta þýðir að tillaga Bjarna fær efnislega meðferð hjá þinginu og mun stjórnskipunar- og eftirlitsnefnd fjalla um málið.

„Við munum taka það fyrir. Það er fyrsti fundur eftir þetta á þriðjudaginn og þar mun ég leggja til að við svona ræðum stuttlega efnistökin og síðan byrjum við hina eiginlegu vinnu við þetta síðar í vikunni," segir Valgerður. Bjarnadóttir, formaður stjórnskipunar og eftirlitsnefndar.

Valgerður segir að reynt verði að vinna málið hratt en örugglega.

„Mun þetta fá einhverskonar flýtimeðferð? Ég vil nú ekki kalla það flýtimeðferð. Við verðum að finna hið gullna jafnvægi á milli þess að gera hlutina vel en vinna þá líka eins hratt og við mögulega getum. En flýtimeðferð vil ég ekki kalla það en ég geri ekki ráð fyrir að við sendum og biðjum um skriflegar umsagnir eða neitt svoleiðis, sem yfirleitt tekur tíma sko, heldur fá fólk á okkar fund.Nú eru mörg aðkallandi mál inni í þessari nefnd verður þetta sett fram fyrir þau? Já, já eða við reynum að vinna það eins mikið samhliða og við mögulega getum. Við erum tildæmis búin að setja upp mjög efnismikla dagskrá út af stjórnlagaráðstillögunum á þriðjudaginn og við ætlum að reyna að halda henni og bæta þá kannski hálftíma við fundartímann til að ræða efnistökin á þessari tillögu," segir Valgerður.

„Nú hefst aðalmeðferð í málinu 5. mars heldurðu að þessu verði lokið þá í meðferð þingsins? Það ætla ég rétt að vona," segir Valgerður.