Öflugur sólstormur á leið til jarðar

Óvenju kraftmikill sólstormur skellur á jörðinni í dag og næstu daga en gríðaröflugt sólgos átti sér stað í gær á norðurhveli sólarinnar. Um er að ræða stærsta sólstorm síðustu sex ára. Að sögn bandarísku geimferðastofnunarinnar NASA mun stormurinn ekki hafa mikil áhrif á jörðunni en truflanir gætu þó orðið á gerfitunglum á braut hennar.

Þungamiðja stormsins mun ekki skella á jörðinni heldur fara framhjá henni. Árið 1989 olli sólstormur viðamiklu rafmagnsleysi í Qebec í Kanada. Ein áhrif stormsins gætu þó orðið þau að Norðurljósin sjáist mun sunnar á jörðinni en vant er í kvöld.