Hálka og erfið færð víðast hvar

Hálka er á Hellisheiði og í Þrengslum og Mosfellsheiði er þungfær. Á Suðurlandi er víða þæfingur eða jafnvel þungfært í uppsveitum en annars staðar er snjóþekja eða hálka.

Þá segir Vegagerðin að hálka sé á Reykjanesbraut og Suðurnesjum. Þæfingsfærð er á Krýsuvíkurvegi og Suðurstrandarvegi. Á Vesturlandi er hálka á flestum vegum. Á Vestfjörðum er veður heldur að ganga niður. Verið er að moka Gemlufallsheiði en enn er beðið með mokstur í Ísafjarðardjúpi, á Steingrímsfjarðarheiði og Þröskuldum.

Á Norðurlandi er víða skafrenningur eða ofankoma, og hálka eða snjóþekja. Þæfingsfærð er fyrir Vatnsnes.

Á Austurlandi er síðan víða snjóþekja og snjókoma er einnig á Suðausturlandi. Þæfingsfærð er vestan Kirkjubæjarklausturs og flughált á Mýrdalssandi.