Var rekinn út af geðdeild - talsmaður sjúklinga skoðar málið

Sjúklingur sem leitaði til geðsviðs Landspítalans segist þar hafa mætt niðurlægjandi hegðun læknis, sem á endanum hafi hent honum út úr viðtali. Talsmaður sjúklinga geðsviðs fær að jafnaði eitt erindi á viku.

Kunningi mannsins sendi bréf sem hann skrifaði um reynslu sína, á þjóðmálavefinn Innihald þar sem það var birt í fyrradag og hefur vakið mikla athygli.

Þar segist maðurinn til fjölda ára notið þjónustu geðsviðs. Í þetta skiptið var læknirinn hans í fríi og ákveðið að leggja hann ekki inn á hans föstu deild.

Maðurinn segir það hafa valdið sér kvíða að fara á deild þar sem enginn þekkti hans mál.

Siðar segist hann hafa lent í útistöðum við lækninn og kallað hann fífl. Þá hafi læknirinn rokið á fætur og öskrað á hann að koma sér út.

Umræddur sjúklingur treysti sér ekki til að koma í sjónvarpsviðtal. Hann hefur hins vegar haft samband við talsmann sjúklinga á geðsviði, sem hefur komið málinu í ferli innan geðsviðs þar sem það verður skoðað nánar.

Samkvæmt vinnureglu tjá starfsmenn spítalans sig ekki um málefni einstakra sjúklinga.

Geðsvið er eina svið Landspítalans þar sem er starfandi talsmaður sjúklinga. Að jafnaði leitar einn sjúklingur til hans á viku, og eru erindin af ýmsum toga.

Flest erindin varða upplifun sjúklings á andrúmslofti á deild sinni, að sjúklingi finnst hann ekki upplýstur um réttindi sín, eða að honum finnist hann ekki fá að hafa næg áhrif á eigin meðferð.