Leita ferðamanns í hlíðum Esjunnar

Upp úr klukkan sex í kvöld voru björgunarsveitir Slysavarnafélagsins Landsbjargar á höfuðborgarsvæðinu kallaðar út vegna slasaðs manns í Esjuhlíðum. Staðsetning mannsins liggur ekki nákvæmlega fyrir en samkvæmt samferðarmanni hans eru þeir staddir austan við hefðbundna gönguleið.

Svo virðist sem maðurinn hafi fallið og meiðst það mikið að hann treystir sér ekki til að halda áfram för sinni gangandi.

Ekki er þó talið að um mjög alvarlega áverka sé að ræða. Fyrstu hópar björgunarmanna sem eru í þann mund að leggja af stað frá bílastæðinu við Esjurætur munu leggja allt kapp á að finna mennina áður en myrkrið skellur á.