Rukka þrátt fyrir óvissu

Bankar og fjármálastofnanir ætla að halda áfram að innheimta gengislán þrátt fyrir óvissu vegna nýfallins dóms Hæstaréttar. Þegar hafa verið sendir út greiðsluseðlar fyrir mars.

Fyrir rúmri viku komst Hæstiréttur að þeirri niðurstöðu að óheimilt hafi verið að reikna seðlabankavexti afturvirkt af láni hjóna sem voru með gengislán. Samtök fjármálafyrirtækja fengu lögmannstofuna LEX til að skoða þýðingu dómsins á önnur slík lán.

Í álitsgerð lögmannstofunnar kemur fram að bæði bæði einstaklingar og fyrirtæki sem voru í skilum með gengislán, þrátt fyrir frystingar eða greiðslufresti, geti vænst þess að falla undir dóminn. Samtökin telja þó að nokkur dómsmál þurfi til að hægt verði að skera úr um öll vafaatriði. Þrátt fyrir óvissu vegna dómsins ætla stóru bankarnir þrír að halda áfram að innheimta lánin og hafa þegar sent út greiðsluseðla vegna marsmánaðar.

Guðjón Rúnarsson, framkvæmdastjóri Samtaka fjármálafyrirtæki, segir það væntanlega ekki farsælt fyrir neinn, hvorki fjármálafyrirtæki né lántaka, að innheimta yrði stöðvuð á meðan að óvissan er svo mikil.

Hagsmunasamtök heimilanna funduðu með efnahags- og viðskiptanefnd í síðustu viku vegna dómsins. Þau telja óeðlilegt að innheimtu fjármálafyrirtækjanna af lánunum verði haldi áfram óbreyttri á meðan óvissa er í málinu.

Andrea Ólafsdóttir, formaður stjórnar Hagsmunasamtaka heimilanna, segir samtökin vilja að innheimtan verði sett í ákveðinn farveg til að mynda með því að debonera og að öllum aðförum verði hætti.

Samtök fjármálafyrirtækjanna hafa óskað eftir leyfi frá Fjármálaeftirlitinu til að ræða saman um málið svo hægt verði að eyða óvissu. Fjármálaeftirlitið á von á að svara því strax eftir helgi hvort að leyfið verði veitt.