Ungmenni á ofsahraða í Bolungarvíkurgöngum

Svo virðist sem fámennur hópur ungra ökumanna stundi hraðakstur í Bolungarvíkurgöngum. Fram kemur á heimasíðu Umferðarstofu að þótt hraðakstur einskorðist síður en svo við bifhjólamenn, þá segja forráðmenn lögreglunnar á Vestfjörðum að algengt sé að einstaka bifhjólamenn fari á ofsahraða um göngin og láti félaga sína vakta ferðir og staðsetningu lögreglu á meðan.

Til að bregðast við þessu hafa verið settar upp hraðamyndavélar í göngunum. Þær hafa dregið stórlega úr hraðakstri en þó virðast einstaka ökumenn sæta lagi þar sem myndavélunum sleppir.

Að sögn Önundar Jónssonar yfirlögregluþjóns hjá lögreglunni á Vestfjörðum virðist þetta vera fámennur hópur ungra ökumanna sem stundar þetta. Í mörgum tilfellum eru ungmennin á kraftmiklum bílum og bifhjólum sem hæfa ekki á nokkurn hátt þeirri takmörkuðu reynslu sem þau hafa sem ökumenn.

„Lögreglu og íbúar hafa af þessu miklar áhyggjur og segja má að það sé hrein tilviljun að ekki hafi fleiri alvarleg slys hlotist af en raun ber vitni," segir Önundur.

Hægt er að lesa nánar um málið á vef Umferðarstofu.