Mjólkin fram og til baka milli landshluta - arfavitlaust segir bóndi

Kúabændur á norðanverðum Vestfjörðum standa í stríði við Mjólkursamsöluna um lokun mjólkurstöðvarinnar á Ísafirði og segja arfavitlaust að aka mjólkinni í aðra landshluta og síðan aftur að sunnan til neytenda fyrir vestan.

Fyrir fjörutíu árum voru níutíu kúabændur á norðanverðum Vestfjörðum en nú eru aðeins níu eftir. Bændurnir fáu sem eftir eru framleiða þó samtals meiri mjólk en allur fjöldinn gerði áður.

Þau Björn Birkisson og Helga Guðný Kristjánsdóttir í Botni í Súgandafirði eru með eitt stærsta kúabúið. Björn segir að menn hafi verið að stækka búin og nánast öll tún á norðanverðum Vestfjörðum séu nýtt. Hann segir að mest hafi 129 framleiðendur lagt inn í mjólkursamlagið á Ísafirði.

Starfsemi mjólkurstöðvarinnar var hins vegar hætt í fyrravor og nú er mjólkinni ekið til vinnslu í Búðardal og unnum mjólkurvörum ekið til Ísafjarðar úr Reykjavík, sem bóndanum þykir vera lítil skynsemi. Raunar arfavitlaust, segir Björn Birkisson.

Áður fyrr voru algengustu mjólkurvörur framleiddar á Ísafirði, eins og nýmjólk, súrmjólk, smjör, rjómi og skyr. Þar störfuðu tólf manns, þegar mest var, en nú eru bara tveir eftir, sem aka mjólkurbíl og dreifa vörum að sunnan í verslanir. Landbúnaðarráðuneytið gekk í lið með bændunum fyrir áramót þegar það ákvað að skilyrða 20 milljóna króna verðmiðlunargjald til MS því að starfsemi yrði tekin upp að nýju í mjólkurstöðinni á Ísafirði.

Forstjóri Mjólkursamsölunnar, Einar Sigurðsson, segir hins vegar litlar líkur á að það gerist. Mjólkurbúum hafi í hagræðingarskyni verið fækkað úr 17 niður í 6 á landinu og samt sé framleiðslugetan vannýtt. Hann segir tækjabúnað stöðvarinnar á Ísafirði úreltan, í ljósi þess að taka eigi upp nýjar mjólkurumbúðir, og rekstur hennar hafi verið óhagkvæmur.

Bændurnir samþykkja ekki þá skýringu og segja að Mjólkursamsalan hafi neitað að leggja fram gögn sem styðji þær fullyrðingar. Helga Guðný segir þó sárast hve illa sé farið með neytendur á svæðinu.

Forstjóri Mjólkursamsölunnar segir unnið að því að koma annarri starfsemi í húsið og kveðst vongóðir um að þannig takist að skapa jafnvel fleiri störf en voru við mjólkurpökkun.