Virkjanir langstærstu tækifæri Skaftárhrepps

Ein virkjun gæti aukið tekjur Skaftárhrepps af fasteignasköttum um 40 prósent. Sveitarstjórinn segir fyrirhugaðar virkjanir langstærstu tækifærin sem sveitarfélagið hafi til atvinnusköpunar.

Tvær stórar virkjanir í Skaftártungu eru nú á teikniborðinu. Landsvirkjun vill virkja Hólmsá ofan Hrífuness og Suðurorka vill virkja Skaftá með Búlandsvirkjun. Báðar virkjanir eru umdeildar, í rammaáætlun ríkisstjórnar eru þær settar í biðflokk.

Skaftárhreppur segir í umsögn að byggðin þar eigi mjög undir högg að sækja. Fækkun íbúa og hækkandi meðalaldur séu augljós merki þess að hér sé um hnignandi samfélag að ræða.

„Fyrir sveitarsjóð eru þetta stærstu tækifærin sem eru í kortunum í dag, langstærstu tækifærin," segir Eygló Kristjánsdóttir sveitarstjóri í viðtali í fréttum Stöðvar 2. Atvinnulíf er einhæft, enginn sjávarútvegur, og mikil uppbygging ferðaþjónustu hefur ekki vegið gegn fólksfækkun.

Horft er á hverju álíka virkjanir skila annarsstaðar. Eygló nefnir sem dæmi að í Blönduvirkjun séu 15 starfsmenn. Fyrir sveitarfélag eins og Skaftárhrepp, með 446 íbúa, muni „rosalega" að fá 10 starfsmenn.

Hér standa menn hugsanlega frammi fyrir ákveðinni þversögn; að taka hagsmuni orkunýtingar fram yfir hagsmuni sauðfjárræktar til að sveitahreppurinn fái þrifist. Virkjun gæti kúvent erfiðri fjárhagsstöðu. Eygló segir að fasteignagjöld af öllum eignum í Skaftárhreppi séu nú rétt um 50 milljónir króna. „Ein virkjun gæti gefið þetta um 20 milljónir."

Andstæðingar virkjana í hreppnum hafa bent á að þær skerði beitiland og ógni sauðfjárbúskap. „Sauðfjárbúskapur er því miður ekki að gefa tekjur, - hvergi," segir sveitarstjórinn.

Eygló segir að þótt sveitarfélagið hafi sett virkjanir inn á aðalskipulag séu það þó bændurnir, eigendur landsins, sem ráði á endanum. „Ef þeir vilja ekki þessar virkjanir, þá náttúrlega semja þeir ekki við fyrirtækin, og þar með er þetta sjálfhætt."