Vill styðja fjárfestingu og efla tengsl

Kína styður viðleitni Evrópuþjóða til þess að viðhalda fjármálalegum stöðugleika og hagvexti. Fréttavefur Kínverska ríkisútvarpsins (CRI) greinir frá því að Wen Jiabao, forsætisráðherra Kína, hafi látið þessi orð falla á fundi með Ólafi Ragnari Grímssyni, forseta Íslands, í byrjun síðustu viku þegar þeir hittust á heimsþingi hreinnar orku í Abu Dhabi í Sameinuðu arabísku furstadæmunum.

CRI segir forsætisráðherrann hafa borið lof á árangur sem náðst hafi í góðum samskiptum Íslands og Kína og kvað Kína vilja viðhalda miklum og góðum samskiptum, þar sem gagnkvæm ráðgjöf yrði fest enn frekar í sessi, sem og gagnkvæmt pólitískt traust.

„Til þess að fást við afleiðingar fjármálakreppunnar ættu löndin tvö að leita leiða til að auka sjálfstraust markaða, víkka út tvíhliða viðskipti, ýta undir gagnkvæma fjárfestingu og dýpka enn samskipti á sviði menningar-, mennta- og ferðamála,“ er haft eftir Wen Jiabao.

Forseti Íslands og kínverski forsætisráðherrann voru sammála um að leiðir landanna lægju saman á fjölda sviða, svo sem í orkunýtingu, baráttu við útblástur gróðurhúsalofttegunda, jarðvarma og jöklarannsóknum. - óká