Segja enga ógn stafa af pilti sem stakk konu tólf sinnum

Samkvæmt áhættumati sem barnaverndaryfirvöld gerðu fyrir lögregluna stafar konu sem stungin var tólf sinnum í lok apríl ekki lengur ógn af árásarmanninum. Móðir konunnar segir að engan hefði getað grunað að drengurinn væri árásargjarn en það hafi samt reynst raunin.

Við greindum frá því í fréttum okkar í gær að 28 ára gömul kona sem lifði af morðtilraun í Kópavogi í lok apríl furðar sig á því að árásarmaður hennar gangi laus. Hún hlaut tólf hnífstungur og óttast mjög að á hana verði ráðist aftur.

„Ég bara velti því fyrir mér hvort þetta sé úrræðaleysi. Að kerfið viti ekki hvað það eigi að gera við svona unga afbrotamenn, hann er sautján að verða átján, er það vegna ungs aldur eða hvað veldur því að hann fær bara að vera laus. Og kemur út úr fangelsi og á sama degi og dóttir mín kemur heim af spítala?" sagði Guðný Björk Guðjónsdóttir, móðir fórnarlambsins.

Í spurningu sem sendar voru á lögreglu í dag var meðal annars spurt um rökin fyrir því að konunni er ekki lengur talin stafa ógn af piltinum sem stakk hana með hnífi fyrir skömmu? Þá var einnig spurt hvort eitthvað hefði verið gert til að tryggja öryggi hennar. Í svörum lögreglu segir meðal annars að drengurinn hafi ekki áður komist í kast við lögregu- eða barnaverndaryfirvöld:

Meginregla í íslensku réttarfari sé að óheimilt sé að úrskurða sakborning yngri en 18 ára í gæsluvarðhald Í þessu tiltekna máli var sakborningur fyrst úrskurðaður í 6 daga gæsluvarðhald vegna rannsóknarhagsmuna. Á grundvelli umrædds áhættumats, þeirrar könnunar sem fram fór á hans högum og annarra gagna málsins var ekki talin ástæða til að vista hann á viðeigandi stofnun, heldur talið hagfelldara að barnaverndaryfirvöld héldi áfram að vinna í hans málum. Sum sé í stað þess að bregða fæti fyrir drenginn og halda honum í áframhaldandi gæsluvarðhaldi var ákveðið að beita þeim úrræðum sem barnaverndaryfirvöld hafa upp á að bjóða.

„Viku áður en þessi árás fór fram hefði engin geta sagt fyrir að akkúrat þessi maður myndi gera þetta. Hann sýndi enga tilburði til þess. Hver ætlar því að segja að annað eins geti ekki gerst? Þannig við ætlum bara forða okkur í smá tíma ég tek enga sénsa. segir Guðný Björk."

Bergrún Sigurðardóttir hjá Drekaslóð segir að lögreglan verði að tryggja öryggi konunnar. Hún segir málið varpa ljósi á úrræðaleysi kerfisins. Standa verði vörð um þá sem verði fyrir ofbeldi. Árásin hafi verið mjög alvarleg og pilturinn virðist hættulegur umhverfi sínu. Ekki sé að undra að konan óttist um öryggi sitt og það verði lögreglan að tryggja.