Útbúa fimm umslög fyrir Skúla

Myndlistarkonan Ingibjörg Birgisdóttir og Orri Jónsson ætla að hanna umslög fyrir fimm plötur bassaleikarans Skúla Sverrissonar. Þau hafa þegar lokið við eitt, sem er við nýja plötu Skúla og saxófónleikarans Óskars Guðjónssonar, The Box Tree. Það er ansi óvenjulegt því hægt er að opna það þannig að það lítur út eins og landakort.

„Þessi tónlist er svo opin og leiðir mann svo margt þegar maður hlustar þannig að okkur langaði að hafa umslagið þannig. Maður opnar þetta landakort og veit ekki hvað það er að sýna og hvert það getur leitt þig,“ segir Ingibjörg um umslagið, sem var silkiþrykkt.

Ingibjörg og Orri störfuðu saman við gerð heimildarmyndarinnar Amma Lo-Fi. Eftir að Orri stjórnaði upptökum á plötu Skúla og Óskars var hann beðinn um að hanna umslagið líka og ákvað að fá Ingibjörgu með sér í verkið. Skúli var svo ánægður með útkomuna að þau munu hanna umslögin fyrir næstu fjórar plötur hans sem eru þegar tilbúnar og munu koma út með frekar stuttu millibili. „Við ætlum að reyna að halda einhverjum smá þræði,“ segir hún, spurð út í umslögin fimm. „Okkur langar að halda áfram á þessari braut og gera eitthvað óvenjulegt.“

Ingibjörg hefur hannað umslög frá árinu 2003. Meðal síðustu verka hennar er umslagið við nýjustu plötu Sigur Rósar, Valtara, og sólóplötu Jónsa, en þau eru systkini. Einnig hefur hún hannað fyrir Sin Fang og Sóleyju, auk þess sem hún leikstýrði tveimur myndböndum fyrir Sigur Rós við lögin Varúð og Ég anda. Jafnframt gerði hún myndband við lag Sóleyjar, Smashed Birds, sem hlaut Íslensku tónlistarverðlaunin fyrr á árinu.- fb