Fullveldisframsal í EES-samningi

Þorgerður Katrín Gunnarsdóttir, þingmaður Sjálfstæðisflokksins, segir að menn verði að horfast í augu við það að EES-samningurinn feli í sér framsal á fullveldi. Á móti komi ýmsir hagsmunir fyrir Íslendinga.

„Þeir sem afbera almennt yfir höfuð ekki neitt tal um fullveldisafsal landsins í allri rökræðu, þeir ættu að mínu mati að vera samkvæmir sjálfum sér og annað hvort krefjast uppsagnar eða þá að fara hina leiðina og krefjast aðildar og hafa þá áhrif á hvernig tilskipanir okkur tengdar líta á endanum út,“ sagði Þorgerður.

Hún var málshefjandi í sérstakri umræðu um skýrslu Norðmanna um EES-samstarfið. Þorgerður sagði að sjálf vildi hún ljúka aðildarviðræðum við Evrópusambandið og bera niðurstöðuna undir þjóðaratkvæði. Ef niðurstaðan yrði sú að búa við EES-samninginn yrðu menn að gera sér grein fyrir því að Íslendingar muni búa við lýðræðishalla, en fá hagsmuni á móti.

Össur Skarphéðinsson utanríkisráðherra tók undir með Þorgerði. Hann sagði að Alþingi framseldi hluta fullveldisins oft í viku með samþykktum ýmissa þingmála.

Hann vill að við endurskoðun stjórnarskrárinnar sé horft til þess að Alþingi verði veitt heimild til þessa framsals.- kóp