Óþekktur maður í gæsluvarðhald

Óþekktur maður var í dag úrskurðaður í gæsluvarðhald en maðurinn var stöðvaður við vegabréfaskoðun 18. ágúst síðastliðinn. Hann framvísaði þá fölsuðu vegabréfi og þegar lögregla gekk á hann um hver hann raunverulega er vildi hann ekkert segja.

Lögregla hefur leitað í farangri viðkomandi en þar kemur ekkert fram sem varpar ljósi á hver hann er. Fingraför viðkomandi hafa verið send til útlanda og nú er beðið upplýsinga um hvort hann sé þekktur í gagnagrunnum erlendra löggæsluyfirvalda.

Að svo stöddu getur lögregla ekki sagt til um hver viðkomandi er. Hann framvísaði fölsuðu vegabréfi sem varðar við almenn hegningarlög. Samkvæmt lögum um útlendinga er heimilt að úrskurða útlendinga í gæsluvarðhald ef þeir neita að gefa upp hverjir þeir eru, grunur er um að þeir gefi rangar upplýsingar um auðkenni sín eða þeir gefi til kynna að af þeim stafi hætta með hegðun sinni.

Með vísan til þessa verður óþekkti maðurinn vistaður í gæsluvarðhald fram á föstudag.