Ævintýralegur fiskafli fimm smábáta í Bolungarvík

Fimm smábátar hafa rifið upp efnahag Bolungarvíkur, fiska allt árið, þykja óvenju fengsælir og koma að jafnaði með um þrjátíu milljóna króna aflaverðmæti að landi í hverjum mánuði.

Guðmundur Einarsson er einn þessara báta en hinir eru Einar Hálfdáns, Hrólfur Einarsson, Sirrý og Vilborg. Hver þeirra hefur verið að veiða í kringum 1.500 tonn á ári á línu, einkum þorsk, steinbít og ýsu, og aflaverðmæti í kringum 350 milljónir á ári, hjá hverjum og einum. Fleiri bátar, eins og Siggi Bjartar, nálgast hina óðum.

Þótt þeir teljist smábátar eru þeir orðnir svo öflugir að þeir veiða álíka mikið á ári og 300 tonna stálskip hefði þótt gott með fyrir tuttugu árum eða svo. Að jafnaði eru þrír menn í áhöfn, tveir róa meðan sá þriðji er í fríi, en auk þess vinna sex manns við línubeitingu í landi fyrir hvern bát.

Frá Bolungarvík er stutt að sækja á smábátum á fengsæl mið og bæjarstjórinn, Elías Jónatansson, kætist yfir aflaaukningu. Hann segir að aflinn síðustu þrjú árin hafi að meðaltali verið um 25% meiri miðað við tíu árin þar á undan. Aukingin skýrist einkum af kvótakaupum, en eigendur bátanna hafa lagt mikið undir til að kaupa meiri kvóta á undanförnum árum.

Og Bolvíkingar ætla sér enn stærri hlut á næstum árum því það styttist í að þeir fái afhenta þrjá nýja báta sem verið er að smíða í Trefjum í Hafnarfirði, en þeir eru allir yfirbyggðir og sérsniðnir til að smella undir 15 tonna stærðarmörkin. Í Víkinni finna menn bæjarbraginn breytast, eins og heyra má Elías bæjarstjóra lýsa í viðtali í fréttum Stöðvar 2.