Bjarni Benediktsson: Undarlegt samstarf og örvæntingafullt

„Já, er það ekki dálítið athyglisvert að við heyrum það frá Hreyfingunni að ríkisstjórnin njóti ekki meirihlutastuðnings á þinginu? Mér finnst það mjög athyglisvert að Jóhanna [Sigurðardóttir] og Steingrímur [J. Sigfússon] telji stöðu sína svo veika, eftir ráðherrakapalinn síðasta vetur, að þau finni sig knúin til þess að funda með Hreyfingunni til þess að verja ríkisstjórnina falli," segir Bjarni Benediktsson, formaður Sjálfstæðisflokksins, í samtali við Reykjavík síðdegis.

Hreyfingin tilkynnti það fyrr í dag að þingmenn hennar væru tilbúnir að verja ríkisstjórnina falli takist samningar um framgang ákveðna mála sem Hreyfingin telur brenna helst á þjóðinni.

Þessi mál eru meðal annars þjóðaratkvæðagreiðsla um tillögu stjórnlagaráðs að nýrri stjórnarskrá, persónukjör, leiðir til almennrar skuldaleiðréttingar og afnám verðtryggingar, sem og framtíðarfyrirkomulag fiskveiðistjórnunarkerfisins eins og fram kom í tilkynningu frá Hreyfingunni í dag.

Bjarni segir tíðindin þó ekki koma á óvart, enda legið óformlega fyrir síðan um jólin að ríkisstjórnin leitaði til Hreyfingarinnar um stuðning. Bjarni segir verkefni ríkisstjórnarinnar hafa mótast af þessu óformlega sambandi, meðal annars með ákærunum gegn Geir H. Haarde.

Bjarni segir hinsvegar öðrum spurningum ósvarað, svo sem hversvegna Hreyfingin hafi greitt atkvæði með tillögu um vantraust á ríkisstjórn sem var felld á þinginu fyrr í vetur.

„Þetta er allt afskaplega undarlegt í mín eyru," sagði Bjarni sem telur ríkisstjórnina búa við kreppu og Hreyfinguna í alvarlegri málefnakreppu. „Enda er hún að þurrkast út í öllum mælingum," bætir Bjarni við sem telur útspil Hreyfingarinnar örvæntingarfullt.

Hægt er að hlusta á viðtalið í heild sinni hér.